ගූගල් ඩූඩල් පෙබරවාරි 22: සොඳුරු කිඹුල් දඩයම්කරු

The Crocodile Hunter : ස්ටීව් අර්වින්
විශාල උරගයන් හා වෙනත් සතුන් ගැන තමාගේ රැකියාවෙන් මෙන්ම  රුපවාහිනී වැඩසටහන් මාලාවකින් ලෝකයාගේ ඇස් ඇරවූ පරිසර සංරක්ෂකයෙක්, විද්‍යා අධ්‍යාපනඥයෙක්, සත්ව ගවේෂකයෙක්  වූ  Steve Irwin වෙනුවෙනුයි අද ගුගල් ඩූඩලය slide show එකක්ම කර තිබෙන්නේ.

ඔහුගේ 57 වන උපන්දිනය වෙනුවෙන් ඔහුට ගෞරව දැක්වීමට හා ඔහු සහ පවුලේ අය ලෝකයේ වනජීවීන් හා වනජීවීන් වෙසෙන ස්ථාන සංරක්ෂණයට කරන ලද කැපවීම් වෙනුවෙන් මේ දිනය වෙන්කරන බව ගුගල් ඔවුන්ගේ සටහනේ කියා තියෙන්නේ.

1962 පෙබරවාරි 22 දා ඔස්ට්‍රේලියාවේදී පරිසරයට හා සතුන්ට බෙහෙවින් ආදරය දැක්වූ අර්වින් පවුලේ ඉපදුනු ස්ටිවන් රොබර්ට්ට  හයවන උපන්දිනයට තෑගි ලැබුණේ ෆ්‍රෙඩ් නම් අඩි 11ක් දිග පිඹුරෙක්. 70 දශකයේ මුල් භාගයේ එම පවුල ක්වීන්ස්ලන්ඩ් ප්‍රදේශයට සංක්‍රමණය වී උරගයන් සඳහා කුඩා Beerwah Reptile Park ආරම්භ කළා.
ළමාවියේ  සිටම කිඹුලන් ඇතුළු උරගයන් ඇසුරේ හැදුනු වැඩුණු ස්ටීව් තම දෙමාපියන්ගෙන් උරගයන් ගැන බොහෝ දැනුම ලබාගත්තා. තම පවුලේ උරග උද්‍යානයේ කටයුතු සඳහා සහභාගී වූ ඔහු එහි සතුනට ආහර දීම අනෙකුත් පාලන කටයුතු ආදී සියල්ලට සහය වුණා.
නමවන වියේදීම ක්වීන්ස්ලන්ඩ් හි කිඹුලන් පරිපාලන ව්‍යාපෘතියකට ස්වේච්චාවෙන් සහභාගි  වූ ඔහු ලොව වෙසෙන විශාලතම උරගයන් වන මුහුදු කිඹුලන් අල්ලා ඔවුන් නිරුපද්‍රිතව වඩා හොඳ පරිසරයකට මුදාහැරීමේ කටයුතුවල නිරතවුණා.

ක්‍රමයෙන් ව්‍යාප්ත වූ ස්වකිය උද්‍යානයේ සම්පුර්ණ පාලනය 1991දී ස්ටීව්ට භාරවුනි. ක්‍රමයෙන් පුළුල් වෙමින් 1998දී නම වෙනස්කළ එය අධ්‍යාපනික හා සංරක්ෂණ කටයුතුවල යෙදෙමින් දැන් හඳුන්වන්නේ ඕස්ට්‍රේලියා සත්ව උද්‍යානය Australian Zoo නමින්.
ඔහුගේ උද්‍යානය නැරඹීමට ඇමරිකාවේ සිට පැමිණි ස්වභාව විද්‍යාඥ ටෙරී රෙයින්ස් සමග විවාහ වුනු ඔවුන්ට මධුසමයේ දී කිඹුලන් දඩයම් කරන්නන්ගෙන් කිඹුලන් බේරාගැනීමේ මෙහෙයුමක යෙදෙන්න වුණා. එම වීඩියෝ දර්ශණ  The Crocodile Hunter නම් රුපවාහිනී වාර්තා වැඩසටහන් මාලාවක පළමුවැන්න වුණා. ඕස්ට්‍රේලියාවෙත් උතුරු ඇමරිකාවෙත් තවත් රටවල් 130කත්  විකාශය වූ මෙම වැඩසටහන් මාලාවේ සාතිශය ජනප්‍රියත්වයට ස්ටීව් ගේ ව්‍යක්ත, ආදරණිය  හා ප්‍රීතිමත් ඉදිරිපත් කිරීමේ විලාශයත් දායක වුණා. ඔහු ඉතා සාර්ථක ඉදිරිපත් කරන්නෙක්.

මිනිසුන්ගේ එතරම් අවධානයක් නොමැති කිඹුලන් හා වෙනත් සත්වයින් පිලිබඳ අවධානය ලබාගෙන එම සතුන් සංරක්ෂණය උදෙසා මෙම වැඩසටහන් මාලාවෙන් අනගි සේවයක් ඉටුව තිබෙනවා. තම කුඩා දරුවන්ද  කිඹුලන් සිටින අවස්ථා රූගත කිරීම්වලට සහභාගී කරවාගෙන තිබෙනවා. කුඩා පුතු වඩාගෙන කිඹුලන්ට ආහාර දෙන දර්ශනයක් විවේචනයට පවා ලක්වුණා.
ක්‍රොකඩයිල් හන්ට් වැඩසටහන්වල  සාර්ථකත්වය නිසා වෙනත් ස්වභාව වනජීවී රුපවාහිනී වැඩසටහන් හා චිත්‍රපටවලට දායකත්වය දීමටත් ඔවුන්ට අවස්ථාව ලැබුණා.
2006 සැප්තැම්බර් 4වෙනිදා ක්වින්ස්ලන්ඩ් මුහුදු තීරයක නවතම වැඩ සටහනක් වන Ocean's  Deadliest  රූ ගත කිරීම අතරතුර stingray නම් මඩුවෙක්ගේ වල්ගා ප්‍රහාරයකින් අනතුරට ලක්වූ ස්ටීව්, පරිසරලෝලින්ගේ අපරිමිත ශෝකයට හේතුවෙමින් මරණයට පත්වුණා.

"මගේ රැකියාව, මගේ මෙහෙවර මේ ලෝකයට බිහිවීමේ හේතුව වනජීවීන් රැකීමට කියල මම හිතන්නේ" ඔහු වරක් පැවසුවා. ස්ටීව් මේ වදන් පවසා බලා සිටියේ නැහැ. ඔහුගේ Wildlife Worriers ස්වේච්ඡා ආයතනය, ලොව පුරා සියගණන් ප්‍රදේශ වනජීවී සංරක්ෂණ ප්‍රදේශ බවට පත්කරන්නට දායක වුණා. අදටත් එමගින් සුමාත්‍රා කොටි, කාම්බෝජ අලි, කෝලා වලසුන් ඇතුළු විවිධ සතුන් සංරක්ෂණය කිරීමේ වැඩසටහන් දියත් කරමින් තියෙනව.
ඔහුට වනජීවීන් ගැන හිත කරදර කරගන්න හේතු තිබුණා. ලෝක වනජීවී අරමුදලේ වාර්තා අනුව 1970 සිට මේ වනවිට ලෝකයේ පෘෂ්ඨවංශි (උභයජීවී, උරග, පක්ෂි, ක්ෂීරපායි) සත්ව ගහනය 60% කින් අඩුවී තිබෙනවා. මනුෂ්‍ය වර්ගයාගේ අතපෙවීම් නිසා අනාගතයේ පොලෝ තලයේ ජෛව විවිධත්වය අඳුරට යන ලකුණු පෙනෙන්නේ.

මේ අපුර්ව වූ ලෝකයේ අසිරිමත් සිදුවීම් මිනිස් අතින් විනාශ වී වියුක්ත දේ පමණක් බවට පත්වන්නට පෙර සොබා දහම තම නිවස බවට පත් කරගෙන එහි දුර්වල තත්වයන්  වඩා ආකර්ශනීය ලෙසකින් අනෙකුන්ගේ අවධානයට යොමු කිරීමේ කටයුත්ත කරන අල්පයක් දෙන අතරින් ස්ටීව් පෙරමුණේ සිටියා. ඒ සේවය අගයනු වස් ඕස්ට්‍රේලියානු රජය ඔහුට නොයෙක්වර සම්මාන හා පදක්කම් පිරිනමා තිබෙනවා. ඔහු හා පියා  විසින් සොයාගනු ලැබූ එතෙක් නොදැන සිටි ඉබි වර්ගයක් Elseya irvini ලෙස නම් කෙරුණා. සෑම වසරකම නොවැම්බර් 15 දා ස්ටීව් අර්වින් දිනය ලෙස නම්කර ඇති අතර එදින ජාත්‍යන්තර වනජීවී හා අරමුදල් රැස්කිරීමේ දිනයක් ලෙස යොදා ගැනෙනවා.

ලොව වෙනුවෙන් කරන තමාගේ කාර්යය සැඟවී යා  නොදී අනෙක් අයගේත් දෑස ඒ වෙත යොමු කරන්නට ස්ටීව් මැදිහත්ව කල කටයුතු ඉදිරියට ගෙනයාමට  ඔහුගේ පවුලෙන් සිදුවන්නේ  ඉමහත් සේවාවක්. මෙවැනි දිනයක එය ඇගයීමෙන් ගුගල්  සමාගම ද ලොව වන ජීවී සුරැකීම වෙත මානව සිත් සතන් යොමුකරවා  තිබෙනවා.

උදව්:
www.vox.com/science-and-health/2019/2/22/18234978/steve-irwin-57-birthday-google-doodle-crocodile-hunter
timesofindia.indiatimes.com/india/google-doodle-celebrates-57th-birth-anniversary-of-steve-irwin-the-crocodile-hunter/articleshow/68105486.cms
https://en.wikipedia.org/wiki/Steve_Irwin

විදුලි සෝපානයක (elevator/ lift ) හිරවුනොත්

පහුගිය දිනවල පාර්ලිමේන්තු මන්ත්‍රී කණ්ඩායමක් විදුලි සෝපානයක හිරවූ අවස්ථාව වාර්තා වීමත් සමග ඒ ගැන කතාබහක් ඇතිවිය.  අක්‍රිය වුණු සෝපානයකින් පනින්නට ගිය තරුණයෙක් ඊට හිරවී මියගිය අවාසනාවන්ත සිද්ධියක්ද  මෑතකදී වාර්තා විය.  විවිධ අවස්ථාවල විවිධ ගොඩනැගිලි භාවිතා කිරීමේදී අපි කාටත් විදුලි සෝපානයක් භාවිතා කරන්නට සිදු වීම සාමාන්‍ය දෙයක්. විශේෂයෙන් තට්ටු වැඩි ගණනක් තියන ගොඩනැගිල්ලක වෙන විකල්පයක් නැති තරම්. එසේම සෝපානයක් අතරමගදී ක්‍රියා විරහිත වීමත්  සිදුවෙන්න සම්භාවිතාවක් ඇති දෙයක්. ඒ නිසා යම් හෙයකින් සෝපානයක් තුල සිටින අතර එය අක්‍රිය වුවහොත්  කල යුත්තේ කුමක්දැයි මේ ලිපියෙන් පැහැදිලි කෙරේ.

මුලිකම දෙය එවැනි අවස්ථාවක ඔබ මරණය අභියස ඉන්න බවට  සාධක නැත්නම්  උදව් ඉල්ලා උදව් ලැබෙන තෙක් කල්පනාකාරීව සන්සුන්ව සිටීමයි. එසේ නොකර කලබල වී සෝපානයෙන් එලියට යාමට කරන උත්සාහයන් වඩා භයානක අවස්ථාවක් ඇති කළ හැකිය. 

 නිවැරදි ක්‍රමය: උදව් ඉල්ලා සිටීම 

1. ඕනෑම කෙනෙක් සෝපානයක හිරවුණු බව දැනගත් වහාම කලබලයට පත්වීම සාමාන්‍ය දෙයක්. ඔබ තනිව නොසිටින්නේ නම් අවට සිටින අය කලබල වනු දැක ඔබ තවත් නොසන්සුන් වෙනු ඇති. එසේ කලබල වුවහොත් එය ඔබේ සිරුරට බලපා ඔබ නිවැරදි තීරණ ගැනීමේ අපහසු  තත්වයකට පත්කරයි.   දිග හුස්මක් ගෙන සිත සන්සුන් කරගැනීම මුලින්ම කලයුතුයි.

2. විදුලිබලය ක්‍රියාවිරහිත වීම නිසා හෝ වෙනත් හේතුවක් නිසා සෝපානය තුළ ආලෝකය නැත්නම් ඔබගේ දුරකථනය හෝ ටෝච් එකක් වැනි ආලෝකය සපයන උපකරණයකින් ආලෝකය සපයාගන සෝපානයේ බොත්තම් පුවරුව බලන්න. එහෙත් ලයිටර වැනි දෙයක් භාවිතා නොකරන තරමට හොඳයි. බොහෝවිට හදිසි බොත්තම් අනිත්වට වඩා තරමක් උන්නතව තිබුණත් ආලෝකයක් ඇතිනම් එය භාවිතයෙන් වඩා නිවැරදි බොත්තම තෝරාගත හැකියි.

3. Call ලෙස ඇති බොත්තම ඔබා කිසිවෙක් සම්බන්ධ කරගැනීමට උත්සාහ කරන්න. බොහෝවිට එය ගොඩනැගිල්ලේ පිළිගැනීම් කවුන්ටරය හෝ නඩත්තු අංශය හෝ සෝපාන තාක්ෂණ ශිල්පියෙක් වෙත ඔබව සම්බන්ධ කරයි. මෙය සිරවූ අය ඉවත්කරගැනීමට තිබෙන පහසුම විශ්වාසදායකම හා ඉක්මන් ක්‍රමයයි. බොහෝ  සෝපානවල සීනුවක් සඳහන් බොත්තමක් ඇත. එය අනතුරු ඇඟවීමේ සිනුවකි. එය ක්‍රියාත්මක කරන්න. 

4. පිළිතුරක් නොලැබුණොත් හදිසි ඇමතුම් අංකයකට හෝ ඔබ ළඟ අංකය  ඇත්නම් පොලිසියකට කතා කරන්න. ගිනි නිවන අංශවලත් මේ සඳහා පුහුණු තාක්ෂණ නිලධාරීන් සිටිති. නැවතත් වරින් වර සීනුව සඳහන් බොත්තම ඔබන්න. සම්බන්ධ වන පළමු තැනැත්තාට ස්ථානය හා ඔබ සමග සිටින සංඛ්‍යාව පවසන්න.

5. දොර අරින්නට ඇති බොත්තම ඔබන්න. සෝපානය නැවතී තිබෙන්නේ මහලක බිමක් හා සමපාතව නම් හා දොර විවෘතවන  බොත්තමේ දෝෂයක් පමණක් නම් එය විවරවීමේ සම්භාවිතාවක් ඇත. ඔබට යාමට අවශ්‍ය මහලේ අංකය නොව, සෝපානය නතර වී ඇති ආසන්නම  මහලේ අංකය එබිමත් ප්‍රතිඵලදායක විය හැකියි.
දොර පියන් විවර වෙන තැනින් යම් ආලෝකයක් පෙනෙන්නේ නම් ඔබ සිටින්නේ මහල් දෙකක් අතරමැද නොවේ. නැවතී තිබෙන මහල නිවැරදිව නොදන්නේ නම් වරකට එක බැගින් මහල් සඳහා ඇති බොත්තම ඔබා දොර විවර කිරීමේ බොත්තම ක්‍රියාත්මක කරන්න. පියවර අතර පරතරයක් තබමින් සියලු මහල් සඳහා මෙය සිදු කරන්න.

6. මේ සියලු දේ සිදුකළත් කිසිවෙකුගෙන් ප්‍රතිචාරයක් නැතිනම් සෝපානය අසල යන එන අයගේ  අවධානය ගැනීමට සපත්තුවක් වැනි දෙයකින් දොරට තදින් තට්ටු කිරීම හෝ දොර අතර ඇති ඉඩෙන් උදව් ඉල්ලා හඬ නැගීම සිදුකරන්න.
සෝපාන තුල ඔක්සිජන් මදි වේයයි සමහරු හිතුවත් සෝපාන සම්පුර්ණයෙන් වායුරෝධක කර නැත. ඒ නිසා හොඳින් හුස්මගෙන හඬ නගා ආධාර ඉල්ලා, කාගේ හෝ අවධානය ලබාගන්න. අනවශ්‍ය ලෙස කෑ ගැසීමෙන් සිත නොසන්සුන් විය හැකි බැවින් කල්පනාකාරී වන්න.

7. මේ සියල්ලෙන්ම ගොඩනැගිල්ල තුල සිටින පිටස්තරයෙක්ගේ අවධනය ගැනීම අපහසුනම් දුරකථනය භාවිතයෙන් සමීපතමයෙක් දැනුවත් කරන්න. සමාජ ජාල භාවිතයෙන් අසල ස්ථානයක  සිටින විශ්වාසවන්ත කෙනෙක්ට පණිවිඩයක් යවන්න.

8. ආධාර ලැබෙනතෙක් සන්සුන් වන්න. තවත් අය සෝපානය තුළ සිටියිනම් ඔව්න් සමග කතා කරමින්  සැහැල්ලු වීමට උත්සහ ගන්න.
ඔබ තනිව සිටින්නේ නම් අතේ ඇති පොතක් හෝ කියවීමට උත්සහ කරන්න. ආනාපානසති භාවනාව හුරුනම් එය කරන්න. අවධානය යොමු කරමින් සෙමෙන් හුස්ම ගන්න. නුදුරු අනාගතයේ සැලැස්මක් පිළිබඳව සිතන්න. ආහාරයක් ඇත්නම් ගන්න. මේ කිසිවක් කිරීමට සිත නොදේ නම් හැකිතාක් සන්සුන්වන්න.  දුරකතනයේ බැටරිය ආරක්ෂා කරගත යුතු නිසා එය භාවිතය අඩු කරන්න. 

9. පිටස්තරයෙක්ගේ උදව් නොමැතිව ඉබේ දොර ඇරුණහොත් පිටතට අඩිය තැබීමට පෙර STOP බොත්තම ඔබන්න. එවිට යම් හෙයකින් සෝපානය නැවත ගමන් කිරීම වැළකේ.

විදුලිබලය ක්‍රියා විරහිතවිමක් නිසා සෝපානය නැවතුනේ නම් නැවත විදුලිය ලැබීමත් සමග එය ක්‍රියාත්මක වේ.

කිසිම විටෙක සෝපානයේ දොර බලෙන් විවෘත කිරිමට උත්සහ නොගත යුතුය. එය විවර වුනත් යම් මහලක පොලව මට්ටමේ සෝපානයේ බිම පිහිටා නැත්නම් මහලේ ඇති ශාෆ්ට්දොර විවර නොවේ. පිටතට පැනීමට ගන්න උත්සාහයකදී බිත්තියත් සෝපානයත් අතර හිරවීමට ඇති ඉඩකඩ වැඩිය. බිමට වැටුනහොත් පහලින් ඇති සෝපාන යන්ත්රෝපකරණ මත වැටීමෙන් මරණය පවා සිදුවිය හැකිය. හදිසියේ සෝපානය නැවත ක්‍රියාත්මක වුවහොත් පනින්නට හදන තැනැත්තාගේ මෙන්ම සෝපානය තුල සිටින අනෙක් අයගේ ජීවිතද අවදානමට ලක්වේ. මෙවන් අන්තරායකර උත්සාහයන්ගෙන් සිදුවන්නේ උදව් පිණිස එන වෘත්තිකයන්ට තම කාර්යය සඳහා වැඩි කාලයක් ගතවීමයි. හිරවූ අවස්ථාවක වඩා ආරක්‍ෂිත ස්ථානය සෝපානය ඇතුලත ය.
නවීන සෝපාන සියල්ලක්ම සකසා ඇත්තේ විවිධ ආරක්‍ෂක උපක්‍රම සහිතවය.

යම් හේතුවකින් සෝපානය වේගයෙන් බිමට වැටෙනු ඇතැයි බියක් ඇති කරගත යුතු නැත. එසේ වැටුනත් එය දරාගත නොහැකි වේගයෙන් නොවේ. එසේම එවැනි අවස්ථාවක මගීන් ආරක්ෂා කරගැනීමට උපකරණ තිබේ.

ගොඩනැගිල්ලක ගින්නක් ඇති අවස්ථාවක සෝපාන භාවිතා නොකළ යුතුයි. එසේම ශාෆ්ට් දොර ඇරුනත් සෝපානය නැත්නම්, දොර ඇරී තිබෙනවිට සෝපානය ගමන් කරන්නේනම්, නැවතී ඇති සෝපානය පොලව සමග සම මට්ටමක නැත්නම් හා සෝපානය තුල අඳුරුනම් එයට ඇතුළු නොවීම ඔබේ ආරක්ෂාව පිණිස වේ.
සෝපානයේ ගමන් කල හැකි උපරිම සංඛ්‍යාව ගැන විමසිලිමත් වන්න. බොහෝ නවීන සෝපාන එම සංඛ්‍යව ඉක්ම ගියහොත් දොර වැසෙන්නේ නැති අතර අනතුරු හැඟවීමේ සීනු නාදයකින් ඒ බව දන්වයි.

යම් හෙයකින්  ඔබ ගමන් ගන්නා සෝපානයක් අක්‍රිය වුවහොත් එයට මුහුණ දෙන පළමු තැනැත්තා ඔබ නොවෙන බවත්, වසරකට ලොව පුරා දහස් ගණනක් මෙම නොසතුටු අත්දැකීම ලබන බවත් මතකයට ගන්න.
අදාළ පුද්ගලයන්ට දැනුම් දීමෙන් පසු උපරිම පැයක් දෙකක් අතර කාලයක් තුළ හිරවී සිටින අය පිටතට ගැනීමේ හැකියාව ඒ සම්බන්ධ තාක්ෂණ ශිල්පීන්ට තිබේ. අලුත්වැඩියා කටයුතු කෙරෙන අතර සෝපානය ඉහල පහල යාමක් සිදුවිය හැකි වුවත් ඒ ගැන බිය විය යුතු නොවේ. පිටතට පැමිණෙන සෝපාන දොරටුව නිසි ලෙස විවර වනතෙක් සන්සුන්ව සිටීමයි වැදගත්. 

උදව්: 

www.wikihow.com/Escape-a-Stranded-Elevator
science.howstuffworks.com/transport/engines-equipment/elevator8.htm

www.youtube/.com/watch?v=-c-7mjSUiOE
newyork.cbslocal.com/2016/07/05/elevator-safety
www1.nyc.gov/assets/nycha/elevator_safety
www.quora.com/What-should-you-do-if-you-get-stuck-in-an-elevator

ගූගල් ඩූඩල් පෙබරවාරි 8: ක්‍යුබෙක් ශිශිර සැණකෙළිය

සීතල දැඩි වුණාම හිම වැටෙනකොට මිනිස්සු පුළුවන් ඉක්මනින් ගෙවල්  ඇතුලට ගිහින් විවේක සුවයෙන් ඉන්නවා කියලද හිතන්නේ? ඔව්. සීතලෙන් ආරක්ෂා වෙලා ඉන්න පුළුවන් තරම් උත්සහ ගන්නවා. හැබැයි එහෙමයි කියල මාස තුන හතරක් කම්මැලිකමේ ඉන්නත් බැහැනේ. සොබාදහම දුන් දේවල් විඳිනවා. එහෙම රසවත්ව සොබා දහම වින්දනය කරන උත්සවයක් ගැන අද ගුගල් ඩූඩල් හි සඳහන් වෙන Quebec Winter Carnival.

කියුබෙක් කියන්නේ කැනඩාවේ විශාලම ප්‍රාන්තය වගේම විශේෂ ප්‍රාන්තයක්. ඒ ගැන කෙටි විස්තරයක් කළොත් ආසියාව හොයාගෙන නැගෙනහිර දෙසට ගිය යුරෝපින් ඇමරිකා මහද්වීපයට ගොඩ බැස්සානෙ. මුලදී පෘතුගාලය, එනගලන්තය, ප්‍රංශය, ස්පඥ්ඥය  ඔය කොහෙන් ආවත් ඇති තරම් ඉඩ තියෙන මහාද්වීපය හිතු හැටියේ අල්ලගත්තා. පහු වෙනකොට තමන්ට කියල කොටස් වෙන් කරගන්න පටන් ගත්තා. උතුරු ඇමරිකාවේ කැනඩාව තියන ප්‍රදේශයේ මුල ඉඳන්ම පදිංචි වුණේ ප්‍රංශයෙන් හා බ්‍රිතාන්‍යයෙන් ආ අයයි. මේ නිසා රටවල් දෙකම අයිතිවාසිකම් කියන්න ගත්තා. යුරෝපයේ තිබුණු වෙළඳ තරගයත් මෙයට හේතුවක් වුණා. 1756 ඉඳල 1763 වෙනකල් මේ රටවල් දෙක කැනඩාව තමන්ගේ කරගන්න විශාල යුද්ධයක් කළා.

බ්‍රිතාන්‍යය එයින් දිනුව නිසා ඔවුනට රට අයත් වුණත් 1774 දී පනතක් මගින් ප්‍රංශ ජාතිකයන් වැඩිපුර වාසය කළ ක්‍යුබෙක් ප්‍රදේශයේ අයට කතෝලික ආගම අදහන්නත්, ප්‍රධාන භාෂාව විදියට ප්‍රංශ භාෂාව භාවිතා කරන්නත්, ප්‍රංශ සිවිල් නිතිය ක්‍රියාත්මක කරන්නත් අවසර දුන්නා. වෙන් වෙන් කොටස් ලෙස තිබුණු මෙම ප්‍රාන්ත කැනඩාව නමින් එක රටක් බවට පත්වූ 1867, මුලින්ම එම රටට එක්වූ ප්‍රාන්තයක් ක්‍යුබෙක්. ඉන්පසු දෙවරක්ම කැනඩාවෙන් වෙන්ව වෙනම රටක් බවට පත්වන්නට කැමැත්ත විමසා ජනමත විචාරන තිබුණත් සුළු බහුතරයකින් එම අදහස පරාජය වූ නිසා තවමත් ක්‍යුබෙක් ප්‍රාන්තය කැනඩාවේ කොටසක් ලෙස පවතිනවා.

දැන් අපහු ශිශිර සැණකෙළිය දිහාට හැරුණොත්, අධික ශිතලක් තිබෙන හිම වැටෙන පෙබරවාරි මාසේ මැද පැවැත්වෙන මේ උත්සවය 1894දී ආගමික උත්සවයක් විදියටයි  ආරම්භ වෙලා තියෙන්නේ. ලෝකයේ වැඩියෙන්ම හිම වැටෙන නගරයක් වන ක්යුබෙක් ප්‍රාන්තයේ ප්‍රධාන නගරය වන ක්‍යුබෙක් සිටි හි  1955 හිම මිනිසෙක්ගේ මැස්කොට් එකක් සමග දිගටම පවත්වන්නට පටන්ගත් මෙම උත්සවය 65 වන වරටයි අද ආරම්භ වන්නේ. දින දහයක් පුරා පැවැත්වෙන මෙය ලෝකයේ වැඩිම දෙනෙක් සහභාගී වෙන විශාලම ශීත ඍතු උත්සවය ලෙසටයි  සලකන්නේ .

Bonhomme maskot 

දිව රාත්‍රී පෙරහැරවල්, අයිස් වලින් සැදූ මූර්ති, අයිස් මාලිගාවක්, විවිධ ආලෝක සැරසිලි,  ආදිය සහිත මෙම උත්සව මාලාව ශීත සමයේ ආවේණික  අලංකාරය පිළිබිඹු කරන හිම විශ්මලන්තයක් වගේ  ප්‍රීති උළෙලක්. නගරයේ ප්‍රධාන මාවත් සියල්ලක්ම පාහේ විවිධ සැරසිලිවලින් අලංකෘත වෙනවා.  මේ කාලයට තිබෙන - 20℃ ටත්  අඩු  සීතලට සුදුසු ඇඳුමෙන් සැරසුණු නගරයේ මිනිස්සු වගේම සංචරකයොත් එළිමහනට ඇවිත් විවිධ සැණකෙළි අවස්ථාවලට සහභාගී වෙනවා. ආරම්භක උත්සවය හා අවසන් කිරීමේ උත්සවය නගරයේ ප්‍රධාන පුරවැසියා අතින් හිම මාලිගාවෙදී  සිදුවෙන්නේ.

හිම මාලිගය 2014

උත්සවයේ පැවැත්වෙන විවිධ තරග අතරට අයිස් හා හිම මුර්ති තරග, හිම බල්ලන් විසින් ඇදගෙන යන ස්ලෙඩ් තරග, අයිස් හොකී තරග, ලෝරන්ස් ගඟේ කැනොයි පැදීම  ආදිය ඇතුලත්.  වොඩ්කා, බ්‍රැන්ඩි වගේ මත්පැන් අළෙවිසල් වගේම හොට් චොකලට් වැනි උණුසුම් පාන අලෙවිසල්, විවිධ ආපන ශාලා, උණුසුම් ආහාර අලෙවි සැල් ආදිය රාත්‍රියටත්  විවෘතයි.
හිම මුර්ති අඹන ආකාරය දැකගැනීමටත්, අශ්වයින් විසින් අදින ස්ලේ එකක රවුමක් යන්නත් අවස්ථාව තියෙනවා. හිම මත ලිස්සා යාමේ ක්‍රීඩා කිරීම වගේම ස්නෝබෝඩ් ක්‍රීඩාවේ නිරතවෙන්නත් ස්ථාන සකස් කරලා තියනව. මේපල් ගහකින් මේපල් සිරප් එලියට වැගිරෙනකොටම මිදෙන හැටි බලන්නත් පුළුවන්. මේ සීතලේ නාන ඇඳුමින් සැරසී හිම නෑම කරන අයත් ඉන්නවා! පවුලේ සියල්ලන්ට සහභාගී වෙන්න පුළුවන් විවිධ විනෝද ක්‍රීඩා, ගී ගායනා, නැටුම් සංදර්ශණ, ඩාන්ස් පාටි දිවා රෑ   පුරා පැවැත්වෙනවා.
ස්වභාව ධර්මය දෙන දෙයෙහි අගුණ කියමින් කන් කෙඳිරි ගාන්නේ නැතිව සීතල, හිම වගේ දරාගන්න බැරි කාලගුණ තත්වයන් පවා සුවයකට හරවාගෙන එහි රස විඳින හැටිනම් අගය කරන්න ඕනේ.

උදව්:
www.thecanadianencyclopedia.ca/en/article/seven-years-war
www.flightcentre.ca/blog/winter-carnival-in-quebec-city/
www.thetravelempire.com/a-celebration-of-winter-at-the-57th-carnaval-de-quebec/
www.canada.ca/en/canadian-heritage
happytowander.com/quebec-winter-carnival/